Le equipa de gestion de Google
Dr. Eric E. Schmidt, presidente e director general
Dr. Eric E Schmidt ha essite nominate director general in augusto 2001, cinque menses post haber jungite se al consilio executive de Google como presidente. Schmidt anque es le presidente del consilio executive de Novell, ubi ille participa in tote le decisiones significative e strategic e joca un rolo central in le disveloppamento technic e le gestion del compania.
Schmidt veniva a Novell in 1997 ab Sun Microsystems, Inc., ubi ille esseva chef de technologia e gerente executive. Durante su 14 annos a Sun, Schmidt teneva un varietate de positiones executive, e ganiava recognition international pro su contributiones al disveloppamento de Internet como un instrumento pro construer communitates digital in commercio, governamento, education, scientia e cultura. Ille anque esseva instrumental in le disveloppamento e transferimento al mercato de Java, le linguage de programmation independente de platteforma de Sun.
Ante que ille se jungeva a Sun, Schmidt esseva membro del personal de recerca in le Laboratorio de Informatica del Palo Alto Research Center (PARC) apud Xerox. Ille anque teneva positiones apud Bell Laboratories e Zilog.
Schmidt tene le grados de doctor in le informatica e magistro in le electrotechnica del universitate de California in Berkeley. Ille recipeva su baccalaureato in le electrotechnica del universitate de Princeton.
Larry Page, Co-fundator & Presidente, Productos
Larry Page recipeva su baccalaureato de scientia e technica con mention multo honorabile del universitate de Michigan in Ann Arbor. Al universitate de Michigan, Page recipeva numerose premios pro su rolo principal in le amelioration del collegio de scientias technic. Page esseva presidente del Societate de Honor Eta Kappa Nu del universitate de Michigan. Ille actualmente es in congedo ab le universitate de Stanford, ubi ille es candidato pro un doctorato in le informatica con le professor Terry Winograd. Page initiava e dirigeva le projecto de recerca apud Stanford que se ha transformate in Google.
Inter su previe experientias de labor esseva le designo de software apud Advanced Management Systems in Washington (D.C.), e CogniTek in Evanston (Illinois). Influentiate a un etate juvene per su patre, un professor de informatica, Page comenciava usar computatores in 1979. Ille fundava Google Inc. in 1998 con Sergey Brin.
Sergey Brin, nascite in Moscova, recipeva un baccalaureato de scientia con mention multo honorate in le mathematica e le informatica del universitate de Maryland in College Park. Ille actualmente es in congedo ab le programma doctoral in le informatica del universitate de Stanford, ubi ille recipeva su grado de magistro. Sergey, 27, es un recipiente de un bursa de studio pro graduatos del Fundation National de Scientia. Esseva a Stanford que ille incontrava Larry Page e laborava al projecto que deveniva Google. Insimul illes fundava Google, Inc. in 1998.
Brin's interesses scientific include motores de recerca, extraction de information de fontes instructurate, e excavation de datos de grande collectiones de texto e datos scientific. Ille ha publicate plus que un dozena de publicationes in eminente jornales academic, inclusive Extracting Patterns and Relations from the World Wide Web; Dynamic Data Mining: A New Architecture for Data with High Dimensionality, que ille publicava con Larry Page; Scalable Techniques for Mining Casual Structures; Dynamic Itemset Counting and Implication Rules for Market Basket Data; and Beyond Market Baskets: Generalizing Association Rules to Correlations.
Brin ha essite un orator distinguite in un numero de foros academic, commercial e technologic national e international, inclusive Academy of American Achievement; European Technology Forum; Technology, Entertainment and Design; and Silicon Alley 2001. Al tempores que ille non jocula su multe responsibilitates como presidente del compania, Brin studia le trapezio e le immersion aquatic, e participa enthusiasticamente in competitiones de hockey sur le parking con altere Googlatores.
Omid Kordestani, Vice-presidente de disveloppamento commercial & venditas 
Omid Kordestani ha plus que un dozena de annos de experientia con technologia avantiate como consumitor e in interprisas, habente tenite positiones clave apud le pionero de internet Netscape Communications. Como vice-presidente de disveloppamento commercial & venditas, Kordestani faceva crescer le receptas del sito web de Netscape de $88 milliones per anno a plus que $200 milliones in 18 menses.
Kordestani se jungeva a Netscape como director de venditas relative a Fabricantes de Equipamento Original (OEM), e durante su carriera de quatro annos a iste compania ille esseva responsabile pro le attraction de clientes importante como Citibank, AOL, Amazon, Intuit, Travelocity, Intel, @Home, eBay, e Excite. Prior a Netscape, Kordestani teneva positiones in marketing, gestion de productos, e disveloppamento commercial a The 3DO Company, Go Corporation, e Hewlett-Packard.
Kordestani recipeva un grado de MBA (magistro de administration commercial) del universitate de Stanford e un baccalaureato de scientia in le electrotechnica del universitate statal de San Jose.
Tim Armstrong, Vice-presidente de venditas de annuncios
Tim Armstrong se jungeva a Google ab Snowball.com. Como le vice-presidente de venditas e associationes strategic de iste compania, ille gereva un equipa de 100 personas e construeva le fundation de receptas necessitate pro introducer le compania in le bursa post solo 16 menses. Armstrong anque esseva responsabile pro associationes strategic clave que includeva investimentos de equitate e de marketing per New Line Cinema e un association exclusive con le NFL.
Prior a su rolo apud Snowball.com, Armstrong serviva como gerente de venditas national pro le prime revista de internet de IDG, I-Way, e ante isto ille fundava e serviva como director de marketing e venditas integrate apud le interprisas de internet de ABC/ESPN de Starwave e Disney.
Armstrong se graduava a Connecticut College con un duple specialitate de economica e sociologia. Un cursor de marathon dedicate, Armstrong non require somno o nutrimento ultra un siesta occasional e un barra de proteina.
Urs Hölzle, Associato de Google
Urs Hölzle se jungeva a Google ab le universitate de California in Santa Barbara ubi ille esseva un professor associate de informatica. Ille recipeva un grado de magistro in le informatica ab ETH Zurich in 1988, e un burso de studios Fulbright esseva accordate a ille durante le mesme anno. In 1994, ille ganiava un doctorato ab le universitate de Stanford, ubi su recercas se concentrava super linguages de programmation e lor implementation efficace.
Como un del pioneros de compilation dynamic, anque cognite como "compilation just-in-time", Hölzle inventava technicas fundamental usate in le major parte del compilatores Java principal de hodie. Ante que ille se jungeva a Google, Hölzle esseva co-fundator de Animorphic Systems, que disveloppava compilatores pro Smalltalk e Java. Post le acquisition de Animorphic Systems per Sun Microsystems in 1997, Hölzle collaborava con Javasoft in le construction del forte compilator pro Java, Hotspot.
In 1996, Hölzle recipeva un premio CAREER del Fundation National de Scientia pro su labor in implementationes avantiate de linguages orientate circa objectos. Hölzle anque esseva un contributor principal al projecto Infrastructura National de Compilatores de DARPA. Ille ha servite in commissiones de programma pro grande conferentias in le campo del implementation de linguages de programmation, e es le autor de numerose dissertationes scientific e patentes statounitese.
Hölzle esseva nominate Associato de Google post haber servite como le prime vice-presidente de technologia del compania. In iste rolo ille dirigeva le disveloppamento del infrastructura operational del compania e esseva famose pro su calcettas rubie, e anque pro su can del racia Leonberger, Yoshka (le veritabile alpha de iste truppa).
Craig Silverstein, Director de technologia 
Craig Silverstein es actualmente in congedo ab le universitate de Stanford, ubi ille perseque un doctorato in le informatia, con foco al recuperation de informationes e excavation de datos. Silverstein contribueva su expertise in algorithmos de compression a Google, tunc ancora un projecto de recerca a Stanford. Su altere interesses academic include versiones efficientissime de structuras basal de datos, per exemplo "hash tables", e anque le regruppamento efficiente de grande unitates de datos usante Scatter/Gather, e le generation de indices latente e semantic relative a tal regruppamento, le qual ille explorava apud Xerox PARC.
Silverstein se graduava con metion multo honorabile con un baccalaureato in le informatica ab le collegio de Harvard, del qual ille anque recipeva un distinction Phi Beta Kappa, le Burso de studios technic de Microsoft, e recipeva duo vices le premio Derek Bok pro Excellentia in le Inseniamento. Ille esseva le prime persona empleate a Google per le fundatores del compania.
In addition a suppler avisos technic, Silverstein provide al Googlatores lor pan quotidian, empleante tres machinas pro cocer que se executa parallelmente in un systema operative Linux.
