Auglýsingar

Það er auglýsingum að þakka að þú getur notað Google, sem og mörg önnur vefsvæði og þjónustu, án endurgjalds. Við keppumst við að tryggja að auglýsingarnar séu öruggar, ekki uppáþrengjandi og eins markvissar og kostur er. Til dæmis eru engir sprettigluggar með auglýsingum á Google og á hverju ári eyðum við reikningum hundraða þúsunda útgefenda og auglýsenda sem brjóta gegn reglum okkar – svo sem með auglýsingum sem innihalda spilliforrit, auglýsingum um falsaðar vörur og auglýsingum sem miða að því að misnota persónuupplýsingar notenda.

Notkun Google á fótsporum í auglýsingastarfsemi

Fótspor nýtast við að auka áhrif auglýsinga. Án fótspora er erfiðara fyrir auglýsendur að ná til markhóps síns eða átta sig á hversu margar auglýsingar hafa birst og hversu oft er smellt á þær.

Mörg vefsvæði á borð við fréttasíður og blogg eru í samstarfi við Google um að birta notendum vefsvæðanna auglýsingar. Við notum fótspor í ýmsum tilgangi, í samvinnu við samstarfsaðila okkar, svo sem til að koma í veg fyrir að notendur sjái sömu auglýsinguna endurtekið, til að greina og stöðva sviksamlega starfsemi og til að birta auglýsingar sem líklegt er að falli að áhugasviði notandans (svo sem út frá vefsvæðum sem notandinn skoðar).

Við geymum skrá yfir þær auglýsingar sem við birtum í notkunarskrám okkar. Þessar notkunarskrár netþjóna innihalda yfirleitt upplýsingar um vefbeiðni þína, IP-tölu, gerð vafra, tungumál vafra, dagsetningu og tíma beiðninnar og eitt eða fleiri fótspor sem kunna að auðkenna vafrann þinn. Fyrir því eru ýmsar ástæður, þó fyrst og fremst sú að bæta þjónustuna og tryggja öryggi kerfa okkar. Við gerum þessi skráningargögn nafnlaus með því að fjarlægja hluta IP-tölunnar (eftir 9 mánuði) og upplýsingar um fótspor (eftir 18 mánuði).

Auglýsingafótspor okkar

Til að aðstoða samstarfsaðila okkar við auglýsingastarfsemi sína og vefsíðurekstur bjóðum við upp á ýmsa þjónustu, svo sem AdSense, AdWords, Google Analytics og margs konar þjónustu sem fellur undir DoubleClick. Þegar þú skoðar síðu sem notast við þjónustu af þessu tagi, annaðhvort á vefsvæði Google eða hjá samstarfsaðila, getur verið að eitt eða fleiri fótspor séu send í vafrann þinn.

Þau geta verið send frá nokkrum mismunandi lénum, þ. á m. google.com, doubleclick.net, invitemedia.com, admeld.com, googlesyndication.com og googleadservices.com. Viss auglýsingaþjónusta sem við bjóðum gerir samstarfsaðilum okkar kleift að nota þjónustu frá öðrum með okkar þjónustu (svo sem til að mæla og tilkynna um áhrif auglýsinga). Slík þjónusta kann að koma eigin fótsporum fyrir í vafranum þínum. Þau fótspor koma frá léni viðkomandi þjónustu.

Hér eru frekari upplýsingar um gerðir fótspora sem Google og samstarfsaðilar okkar nota og hvernig við notum fótsporin.

Umsjón þín með auglýsingafótsporum

Þú getur notað auglýsingastillingar til að stjórna því hvaða auglýsingar þú sérð og afþakka auglýsingar sem byggja á áhugasviði. Jafnvel þótt þú kjósir að fá ekki upp auglýsingar sem byggja á áhugasviði þínu er mögulegt að þú sjáir auglýsingar á grunni annarra þátta, til dæmis gróflega áætlaðrar staðsetningar þinnar út frá IP-tölu, tegund vafra og nýlegrar leitar sem tengist því sem þú ert að leita að þá stundina.

Einnig geturðu haft umsjón með fótsporum ýmissa fyrirtækja sem notuð eru í auglýsingastarfsemi á netinu, á síðunum aboutads.info choices (Bandaríkin) eða Your Online Choices (Evrópusambandslönd).

Þú getur líka stjórnað fótsporum í vafranum þínum.

Önnur tækni sem notuð er í auglýsingum

Auglýsingakerfi Google notast sum hver við annars konar tækni, svo sem Flash og HTML5, til dæmis til að geta birt auglýsingar með gagnvirka eiginleika. Við kunnum til dæmis að notast við IP-tölu þína til að ákvarða staðsetningu þína gróflega. Við gætum einnig valið handa þér auglýsingar út frá upplýsingum um tölvuna þína eða tækið, svo sem gerð þess, tegund vafra eða skynjara í tækinu, s.s. hröðunarmæli.

Staðsetning

Auglýsingavörur Google kunna að fá upplýsingar eða draga ályktanir um staðsetningu þína út frá ýmsum heimildum. Við kunnum til dæmis að nota IP-töluna þína til að greina staðsetningu þína gróflega, við kunnum af og til að fá nákvæmar staðsetningarupplýsingar frá fartækinu þínu, við kunnum að draga ályktun um staðsetningu þína út frá leitarfyrirspurnum og aukinheldur kunna vefsvæði og forrit sem þú notar að senda okkur upplýsingar um staðsetningu þína. Google notar staðsetningarupplýsingar í auglýsingavörum sínum til að birta þér meira viðeigandi auglýsingar, mæla árangur auglýsinga og senda nafnlaus talnagögn til auglýsenda.

Auglýsingakenni í fartækjum

Til að geta birt auglýsingar í þjónustu þar sem fótspor eru ef til vill ekki í boði (til dæmis í farsímaforritum) kunnum við að nota tækni sem þjónar svipuðu hlutverki og fótspor. Til að afþakka auglýsingar út frá áhugasviði skaltu fylgja þessum leiðbeiningum fyrir fartækið þitt.

Android

  1. Opnaðu forritið Google Settings í tækinu
  2. Veldu Ads (auglýsingar)

iOS

Tæki með iOS 6 og síðari útgáfur notast við auglýsingaauðkenni Apple (Advertising Identifier). Til að fá frekari upplýsingar um hvernig má takmarka auglýsingarakningu með þessu auðkenni skaltu fara í stillingavalmynd tækisins þíns.

Hvað ræður því hvaða auglýsingar Google birtir mér?

Margar breytur liggja á bak við það hvernig auglýsingar eru valdar fyrir þig.

Stundum færðu birta auglýsingu út frá staðsetningu þinni. IP-talan þín er yfirleitt góð vísbending um áætlaða staðsetningu þína. Þú gætir til dæmis fengið upp auglýsingu á upphafssíðu YouTube.com um mynd sem er væntanleg í bíó í þínu landi.

Stundum eru auglýsingar birtar út frá efnistökum vefsíðunnar. Ef þú ert að skoða síðu með garðyrkjuráðgjöf gætir þú fengið upp auglýsingar um garðvörur.

Stundum eru auglýsingar á vefsvæði birtar gegnum Google en valdar af öðru fyrirtæki. Sem dæmi má nefna ef þú hefur gerst áskrifandi að dagblaði á netinu. Blaðið getur þá valið hvernig auglýsingar það birtir þér út frá þeim upplýsingum sem þú hefur veitt því og notað auglýsingavörur Google til að koma þeim til skila.

Hvers vegna fæ ég upp auglýsingar frá Google um vörur sem ég hef skoðað?

Þú kannt að sjá auglýsingar fyrir vörur sem þú hefur áður skoðað, með hjálp aðferðar sem kallast „endurmarkaðssetning“. Gefum okkur að þú farir á vefsvæði þar sem seldar eru golfkylfur en þú kaupir kylfurnar ekki við fyrsta innlit. Eigandi vefsvæðisins gæti viljað hvetja þig til að koma aftur og ljúka kaupunum. Google býður þjónustu sem gerir stjórnendum vefsvæða kleift að beina auglýsingum til þeirra sem heimsækja síður þeirra.

Til að þetta virki les Google annaðhvort fótspor sem þegar er fyrir hendi í vafranum þínum eða vistar fótspor í vafranum þegar þú ferð á golfsíðuna (að því gefnu að vafrinn þinn leyfi slíkt).

Þegar þú heimsækir aðra síðu sem er í samstarfi við Google, jafnvel þótt hún sé alveg ótengd golfi, gætir þú séð auglýsingar um golfkylfurnar. Það er vegna þess að vafrinn þinn sendir Google sama fótsporið. Þannig getum við á móti notað það fótspor til að birta þér auglýsingu sem gæti hvatt þig til að kaupa golfkylfurnar.

Google kann einnig að notast við heimsókn þína á golfsíðuna til að birta þér sérsniðnar auglýsingar þegar þú leitar síðar að golfkylfum á Google.

Endurmarkaðssetning er háð vissum takmörkunum. Til dæmis bönnum við auglýsendum að endurmarkaðssetja vörur á grundvelli viðkvæmra upplýsinga, svo sem heilsufarsupplýsinga eða trúarskoðana.

Frekari upplýsingar um Google auglýsingar.