ഹെർഷെ കമ്പനി സാധാരണയായി ഹെർഷെയ്‌സ് അല്ലെങ്കിൽ ഹെർഷെ എന്നറിയപ്പെടുന്ന ഈ അമേരിക്കൻ കമ്പനി ലോകത്തിലെ ഏറ്റവും വലിയ ചോക്ലേറ്റ് നിർമ്മാതാക്കളിൽ ഒന്നാണ്. കുക്കീസ്, കേക്ക്, മിൽക്ക് ഷെയ്ക്കുകൾ മറ്റു പാനീയങ്ങൾ എന്നിവയടക്കം നിരവധി ബേക്കറി ഉൽപ്പന്നങ്ങളും ഇവർ നിർമ്മിക്കുന്നു. ഇതിന്റെ ആസ്ഥാനം ഹെർ‌ഷെപാർ‌ക്കിന്റെയും ഹെർ‌ഷെയുടെ ചോക്ലേറ്റ് വേൾ‌ഡിന്റെയും കേന്ദ്രമായ പെൻസിൽവാനിയയിലെ ഹെർഷെയിലാണ്. 1894ൽ മിൽട്ടൺ എസ് ഹെർഷീയാണ് അദ്ദേഹത്തിന്റെ തന്നെ ലാൻകാസ്റ്റർ കാരമെൽ കമ്പനിയുടെ സബ്സിഡിയറിയായി ഹെർഷീ ചോക്ലേറ്റ് കമ്പനി എന്ന പേരിൽ ഈ കമ്പനി സ്ഥാപിച്ചത്. അമേരിക്കയിലും ലോകമെമ്പാടുമുള്ള 60 ലധികം രാജ്യങ്ങളിലും ഹെർഷിയുടെ ചോക്ലേറ്റ് ലഭ്യമാണ്. ആധുനിക സാങ്കേതികവിദ്യയും ലേബർ മാനേജുമെന്റ് സംവിധാനവുമുള്ള മൂന്ന് മെഗാ വിതരണ കേന്ദ്രങ്ങൾ ഇവയ്ക്കുണ്ട്. കൂടാതെ, വേൾഡ് കൊക്കോ ഫൗണ്ടേഷന്റെ അംഗമാണ് ഹെർഷെ. ഹെർഷീപാർക്ക് സ്റ്റേഡിയവും ജയന്റ് സെന്ററുമായും ഇത് ബന്ധപ്പെട്ടിരിക്കുന്നു. Wikipedia