உபர் ஐக்கிய அமெரிக்காவின் சான் பிரான்சிஸ்கோவைத் தலைமையிடமாகக் கொண்டு பல நாடுகளிலும் நகரங்களிலும் தானுந்துப் பகிர்வு மற்றும் வாடகையுந்துச் சேவைகளை வழங்கும் பன்னாட்டு நிறுவனமாகும். இந்த நிறுவனம் நுண்ணறிபேசி பயன்பாட்டுச் செயலி மூலம் சவாரிக் கோரிக்கைகளை ஏற்று அதனைத் தங்கள் ஓட்டுநர்களுக்கு அனுப்புகின்றது. பயனாளர்கள் சவாரிக் கோரிக்கைகளை அனுப்பவும் தங்களுக்கு ஒதுக்கப்பட்ட வண்டியின் அமைவிடத்தை சுவடு தொடரவும் இச்செயலியைப் பயன்படுத்துகின்றனர். ஆகத்து 29, 2014 நிலவரப்படி உலகெங்கும் 45 நாடுகளில் 200க்கும் மேற்பட்ட நகரங்களில் இந்நிறுவனம் சேவை வழங்குகின்றது. துவக்கத்தில், உபர் உயர்பகட்டு தானுந்துகளை மட்டுமே வாடகைக்கு வழங்கியது; உபர்பிளாக் என்ற பெயரில் முதன்மைச் சேவையை வழங்கியது. 2012இல் இந்த நிறுவனம் "உபர்X" என்ற திட்டத்தை விரிவாக்கியது; இதில் ஏற்றுக்கொள்ளத்தக்க வண்டியும் தகுதி பெற்ற ஓட்டுநரும் பங்கேற்க இயலும். சட்டவொழுங்கு இல்லாத காரணத்தால், உபர் நிறுவனத்தால் மிகக் குறைந்த கட்டணத்தில் சேவையளிக்க முடிந்தது. இதனால் வழமையான வாடகையுந்துச் சேவைகளை விட விரைவாக பரந்த சந்தையைப் பிடித்தது. Wikipedia