Inguratzen zaituena ezagutzen eta modu zirraragarri eta kreatiboetan arakatzen lagundu nahi dizu Google-k. Maps gusturago erabiliko duzu gure plataformetako irudiei esker, inguruko tokiak nahiz urrutikoak aurreikusi eta araka baititzakezu. Gogor egiten dugu lan irudiak erabilgarriak direla eta mundua gure erabiltzaileek ikusten duten moduan erakusten dutela ziurtatzeko.
Halaber, AA bidezko esperientzia irudimentsu berriak sortzeko balio dute gure irudiek. Mundua arakatzen lagun diezazukete eduki digital berritzailearen bidez, sormen eta aurkikuntza modu berriak eskainita. Google-k irudi horiek AArekin batera arduraz erabiliko ditu, gure pribatutasun-konpromisoak gordeta.
Kanpoko kolaboratzaileek edo Google-k ekar ditzakete Street View-ko irudiak. Irudi bakoitza nork atera duen jakiteko, erreparatu harekin erlazionatuta dagoen eskuduntza-izenari edo -ikonoari. Kanpoko kolaboratzaile batek sortzen dituen eta ondoren Google Maps-en argitaratzen diren irudiak kolaboratzaile horrenak (edo hark izendatzen duen ondorengoarenak) izango dira.
Google-k ekarritako Street View-ko irudien gidalerroak biltzen dira orri honetan. Erabiltzaileek ekarritako Street View-ko irudiei dagokienez, irakurri Maps-en Erabiltzaileek ekarritako edukiaren gidalerroak.
Google-k ekarritako Street View-ko irudien gidalerroak
Street View-ko irudiak ikusten dituzten guztiak gustura geratzen direla eta zerbitzuari etekina ateratzen diotela ziurtatzeko garatu ditugu Google-k ekarritako Street View-ko irudien gidalerro hauek. Eduki desegokiari zer-nolako erabilera ematen diogun azaltzen da gidalerroetan, baita Street View-ko irudiak Google Maps-en argitaratzeko zein irizpide erabiltzen ditugun ere. Irakur itzazu beharrezkoa denean, noizean behin eguneratzen baititugu.
Toki jakin batetik pasatu ziren egunean gure kamerek bildu zutena bakarrik erakusten dute Street View-ko irudiek. Ondoren, zenbait hilabete behar dira bildutako irudiak prozesatzeko. Horrenbestez, ikusten dituzun irudiek hilabete nahiz urte gutxi batzuk izan ditzakete. Bestalde, toki baten irudiak urte askoan bildu baditugu, denbora-makina funtzioarekin irudion bilakaera ikus dezakezu.
Google-k zenbait neurri hartzen ditu banakoen pribatutasuna babesteko Street View-ko irudietan, bai Google Maps-en, bai irudi horiek AAko gaitasun berriak garatzeko erabiltzen ditugunean.
Pribatutasuna babesteko modu automatikoak: puntako teknologia garatu dugu Google-k ekarritako irudietan identifika daitezkeen aurpegiak eta matrikulak Street View-n lausotzeko.
Street View AA generatiborako erabiltzea: AA generatiboko gure eredu ahaltsuak (hala nola Gemini, Nano Banana eta Veo) trebatzeko eta haiei eskaerak egiteko Street View-ko irudiak erabiltzen ditugu. Horrela, tresna baliagarriak eskaintzen ditugu; adibidez, erabiltzaileei eta bazkideei mundu errealeko eszenak irudikatzen dituen eduki digital berritzailea sortzen laguntzeko. AA generatiboari eskaerak egiteko erabilitako irudiak iragazki automatizatu gehigarri batzuetatik pasatzen dira; adibidez, gorputz osoak eta ibilgailuak kentzen dira, gure pribatutasun-arau zorrotzak gordetzeko eta AA bidezko irudietan jendea pertsonalki identifikatzeko balio duen informazioa eta kontuzko informazioa egotea ahalik eta gehien murrizteko.
Lausotze gehiago eskatzea: zure aurpegia edo matrikula gehiago lausotu behar dela ikusten baduzu, edo zure etxe, auto edo gorputz osoa lausotzea nahi baduzu, bidal iezaguzu eskaera bat Eman arazo baten berri tresnaren bidez. Halako eskaerak errespetatzeko, argitaratutako Street View-ko irudiaren kopia guztietan lausotzen dugu edukia.
Lausotzea eta AA bidezko edukia: lausotzeko eskaera bat jasotzen eta aplikatzen dugunean, Street View-ko irudi lausotu berria AA generatiboko eskaera-mezuetatik kanpo utziko dugu, pribatutasunaren inguruan hartu duzun erabakia errespetatzeko. Hala ere, lausotzeko eskaera berriek ez dute eraginik izango hirugarrenek jada sortu edo argitaratu dituzten AA bidezko irudietan.
Eduki desegokia salatzeko, erabili Eman arazo baten berri esteka. Kategoria hauetako edukia hartzen dugu desegokitzat, edukiak balio artistikoa, hezitzailea edo dokumentala duenean izan ezik:
Besteen legezko eskubideak (copyright-eskubideak barne) urratzen dituzten irudiak edo edukia debekatuta dago. Informazio gehiago nahi izanez gero edo DMCAren araberako eskaera bat egiteko, irakurri copyrightaren inguruko prozedurak.
Sexu-eduki esplizitua debekatuta dago.
Legea urratzen duen, ekintza arriskutsuak edo legez kanpokoak bultzatzen dituen, edo indarkeria esplizitua edo funsgabea duen edukia debekatuta dago.
Besteak jazartzeko, edo besteei bullyinga edo eraso egiteko Street View darabilen edukia debekatuta dago.
Banakoen edo taldeen aurkako indarkeria bultzatzen edo justifikatzen duen edukia debekatuta dago, baldin eta eraso horiek arrazan, etnian, erlijioan, ezintasunean, generoan, adinean, nazionalitatean, beteranoen egoeran, sexu-joeran edo genero-identitatean oinarritzen badira.
Talde terroristek zerbitzua ezein helbururekin erabiltzea debekatuta dago (baita kide berriak erakartzeko bada ere). Era berean, kendu egingo dugu terrorismoarekin lotutako edukia, hala nola ekintza terroristak sustatzen dituen edukia, indarkeria bultzatzen duena edo eraso terroristak goraipatzen dituena.
Google-k tolerantziarik ezaren gidalerroak dauzka haurrak esplotatzen direla edo haurren aurkako gehiegikeria erakusten duen edukiaren aurrean. Horrelakotzat hartzen dira, besteak beste, sexu-abusua erakusten duten irudiak eta haurrak jarrera sexualean erakusten dituen edozein material. Horrelako edukirik aurkituz gero, ez ezazu partekatu edo iruzkindu, zure helburua Google-ri eduki horren berri ematea bada ere. Edukia Interneteko beste tokiren batean aurkitzen baduzu, jarri harremanetan AEBko desagertutako edo esplotatutako haurren zentroarekin (NCMEC) zuzenean.
Jendea pertsonalki identifikatzeko balio duen informazioa daukan edukia debekatuta dago; besteak beste, kreditu-txartelen xehetasunak, historia klinikoak edo nortasun-agiriak (zureak edo beste edonorenak).